البنات... أحنا مش عاوزين ضل حيطة أحنا عاوزين سند حقيقي

وعن رأي البنات في مثل "ضل الراجل ولاضل الحيطة " وهل يمكن ان يلجأوا إلى تنفيذ هذا المثل في يوم من الأيام

تقول أسماء رمضان 23 سنة صحفية ومعيدة فى كلية أعلام"وجود الراجل بالطبع مهم في حياة أي أمرأة، بس أنا مش مع مبدأ ضل راجل ولا ضل حيطة ده لانه متبقاش جوازة وجنازة كمان يعني لو كان الراجل مش هيلعب دور في حياتي غير أنه يكون بدل حيطة يبقي بيتنا أولى وأهو أربع حيطان مش حيطة واحدة"

وتؤيدها في الرأي مروة عبدالحميد 25 سنه   أخصائية بناء قدرات  قائلة " انا أرفض بشدة جداااااااااااااا ضل راجل ولا  ضل حيطة بس مشكلتى فى امى  التي تؤمن بهذا المثل مع ان الراجل فى حياتها معملش حاجة ولا نفعها بأي شي "

وأيضا سارة درويش 20 سنه آنسه محررة في مجلة بحلقة ابداااااااااً ، أنا أساسا رافضة أني أكون معتمدة في حياتي على رجالة حقيقين وموجودين زي بابا وأخويا موجودين بجد مش مجرد ضل وأنا رافضة اني أكون معتمدة عليهم لأني حابة يكون لي شخصيتي وأستقلالي ، يوم ما أتجوز بقى هتجوز إن شاء الله لأنه الانسان اللي فاهمني وحاسس بيا ومقدرني .. ومحتاجني أكمله زي ما أنا محتاجاه يكملني وهيحسسني بالأمان والحب لكن لو طلع راجل نص كم ومش زي ما أنا قولت يبقي قلته أحسن

وعن تبرير رفض الاقتران برجل لمجرد كونه ضل فقط تقول مروة 26 سنه علاقات عامة " لو الراجل  مش مأثر في حياتي يبقي مش ليها لازمه الجوازة من أصله لان لو من البداية مجرد ظل هيفضل طول عمره خيال مأته وبالتالي لا يصلح مطلقا لان الزواج مشاركة في كل شيء مش حيطة"

وتضيف قائلة" الزواج سكن وموده ورحمة ولو الموضوع اتاخد علي انه ظل راجل يبقي مفيش تفاهم ولا موده وبالتالي لا سكن ولا رحمة وبعدين كمان لو أخدنا الموضوع علي اساس ظل راجل فعندي أخويا وبابا اللي هما مش مجرد ظل وبالتالي ملهوش لازمة الظل من الأساس "

كذلك نجد إيناس لطفى 32 سنه متزوجة محاسبة ضل راجل ولا ضل حيطه ده مصطلح كان عام بشكل عملي ونظري في قديم الازل مش من بعيد أوي يعني نقدر نقول في الفترات السابقه الي مرحله معينه وهي خروج البنت للتعليم والشغل بعد خروجها قدرت تعتمد علي نفسها وعلي مورد مادي خدوا بالكوا من النقطه ديه مورد مادي اللي هو اكبر الاسباب اللي بيخلي كتيرر من الستات تطبق المثل ده فبعد الاستقلال المادي وتغير بعض المفاهيم الاجتماعيه أصبح هذا المثل لا يطبق في بعض الحالات وبنات كتير بترفض وجود راجل جنبها لمجرد وجود حيطه وبس ولكن وخدوبالكوا بقي من لكن ديه مهما بلغت قوة الانثي واستقلالها التام وقوة شخصها هي في النهاية أنثي وتحتاج الي رفيق وحبيب وده بينطبق برضوه علي الراجل كمان لكن في المجتمعات العربيه اتخدت الصوره العامه ان البنت ضعيفه ومحتاجه اللي يقويها ويحميها عشان هي ضعيفه عشان كده ضل الحيطه هو أحسن ليها تخلف أيوه وهبل كمان بس لسه الفكر ده موجود وبينفذ كمان.

وعن رأيها فى الأمثال الشعبية وخاصة هذا المثل تقول إيمان سلطان 22 سنه آنسه طالبه فى كليه الطب انا مبعترفش بالمثل ده اصلا زى امثال كتير مبعترفش بيها ومبطبقهاش واحيانا بحس ان هيه ليها دور كبير فى التخلف والجهل اللى احنا مستمريين فيه ثانيا بقى انا اعرف ان الواحد لو ماشى فى الشمس ممكن يركن على جنب علشان يقف فى ضل حيطه لكن ضل راجل ثالثا انا شايفه ان المرأه تقدر تعيش بدون راجل فى حياتها رابعا وده الاهم المثل ده مبيتقلش الا على وحده لسه متجوزتش خالص وعلشان يجبروها على الجواز من اى حد او من واحد هيه مش مقتنعه بيه

وأخيرا تفاجئنا مروة حسن مروة حسن 24 سنه آنسه منسقة العلاقات الحكومية بجمعية نهضة المحروسة الأهلية برأيها وتقول ضل راجل ولا ضل حيطة!ضل حيطة ولا ضل راجل؟؟وأمشي فى الضل ليه أصلا؟؟!

الراجل مهم للأنثى زي ما الانثى مهمة للراجل بالضبط والانثى مهمة للراجل اأكتر كمان لأنه من غيرها طفل تايه ياحرام مش هايعرف يعمل حاجه فى حياته كل واحده كده تبص لأخوها او جوزها لو متجوزة وتتخيل انها مش موجوده فى البيت لأسبوع واحد بس وتشوف حالته هاتبقى عامله ازاى:) هيييييييييصه

زمنا ده دلوقتى بالحاله الاقتصادية والثورة الفكرية والحريات اللى بنحاول نكتسبها كل ده ماينفعش نشيله من حساباتنا واحنا بنتكلم عن الموضوع ده ، الانثى محتاجه انسان يشدها ويسندها يعنى موضوع الحيطة ده بقى موديل قديم ومابقاش نافع

وعن رأي علماء الاجتماع في مثل " ضل راجل ولاضل حيطة"  يوضحوا "  أن الكثير من البنات في مجتمعاتنا أصبحوا على وعي بدرجة كبيرة ورؤية للأمور بصورة أوضح ويتعلمون مما يحدث من حولهم فهم يرون ان زيادة معدل الطلاق في زيادة مستمرة وان هذا الطلاق قائم على عدم الاختيار السليم والتفكير الصحيح لرؤية الزواج ،لذا  فأن الكثير من البنات لم يعدن يتزوجن فقط لوجود راجل في حياتهم  وأنما يردن شخص يشاركهم أفكارهم وحياتهم ويدفعهم إلى الإمام ، لذا يجب على كل بنت ان تتروى في الاختيار وتحسنه ولا ترضخ لهذا المثل الذي لاتجني من ورائه غير الفشل وسوء الحظ"